{ الفراشات } رقة القاسي

يتعدل القاف لو ما وده .. يتعدل يكفيني إني أسطّر صادق احساسي أفضفض جروح تنكى قبل ما تدمل وابعثر أوهام دارت في رحى راسي وأشرب من أقداح فكري لين ما أثمل لا صار خمري خيالي ودفتري كاسي أخذ من الوقت ذكرى وحلم مستقبل للحاضر اللي توسد سطر قرطاسي كل مره أكتب عن العشاق واتخيّل حالي متيم سعيد ومغرم يقاسي واليوم أبكتب عن اللي صابني في مقتل وأحتلني بالرضى من ساسي لساسي واساير جنون عاشق ما يبي يعقل يموت في شوفتي ويذوب بانفاسي لا غبت عنه يطوف بعالمي يسأل ولا من لقاني يحط اللوم ويواسي مجنون في العشق ومعدن غيرته أهبل يحب ضحكي ويعشق صرَّة أضراسي ساعة أشوفه طفل مهووس ومدلل وساعة أشوفه رصين وكالجبل راسي وفي كل الأحوال أشوفه أجمل وأجمل يا علّني ما انحرم من رقة القاسي ما أظن شعر(ن) كتبته في حضرته يكمل وأخاف من زود حسنه أعلن افلاسي