{ الفراشات } :: التربية بين الماضي واللحين , عند بعض الناس نفس بعضهن ! ( ساخر )

يقولون البيوت اسرار والبيوت كلامها مايطلٌع لأحد ..
وأحيان يبتليك الله بولد عم والا ولد خالة ماتقدر تقوله شيٌن ابد ! تخاف تعلٌمه شي ويروح يخرخر بها عند امٌه وخواته . عاد تعرفون الحريم العجٌز قرقرقرقر . دوروهم عند وش حطت فلانه ووش سوالها رجالها .

دايم لاطلعت الدوام القى حريم حارتنا كلٌن ماسكة لها كيس فيه قهوة وشاهي باليد اليمين واليد اليسار ماسكة كيس فيه بريال خبز , ولاشفتهم كذا قلت يالله ياكريم اجمع هالحريم على خير ولايحشٌن بأحد ولا يقطٌعن بأحد ! وأروح واسرح لدوامي . والمشكلة انا لاجيت للدوام وشفت لي واحد غريب . اقول للعيال من ذا الضرنط اللي واقف بالمكتب اللي جنبٌنا ؟
والا اقولهم وش فيه جاينا ماغسٌل وجهه .. شوفوا يا عيال غمصة خضرا بوسط عينة تحرك مع مشيته كأنها جلي
بس ما اسرع ما اتحسٌف وأستغفر واتوب . بس وش اسوي ؟ انا احب احتسي على ذا وذاك ولا اخلٌي احد في حالة . احسٌها جنيٌة ورا اذني تقول اقبص فلان والا حط لك علكة معلوجة على كرسي فلان خله ينشب ثوبة بالكرسي ,


خلوني افضفض لكم بالله . احس فيني شي ضايمني وودي احتسي .

في عام 1970 م صمل مطحس . وراح لأبوه عقب ماتعسكر في وزارة الدفاع والطيران . على رتبة جندي ,
وقال يايبه زوجني من بنات آخيك . وأشٌر عليها يايبه وانا باخذها .. أستانس ابوه هاك الوقت وراح لعمٌ الرجال . وقال حنا طالبين النسب منكم . ونبي خزنه لولدنا مطحس .
استانس ابو البنت وقال هذي الساعة المبٌاركة . ويالله حيٌهم وهاتوا القهوة يا عيال ..
بعد فترة . استقل مطحس وأثث بيته . وجاب دافور وجاب طشت غسيل ملابس . وجاب فرشة مخيسة شاريها من الدرعية هاك الوقت ,
بعد ما أثث بيته بأسبوع . جابوا المؤزون وملٌك لهم . واخذ المقسوم وراح .
مطحس ماشالته الأرض من الفرحة . وكان مستانس أنه دخل شبك الحياة الزوجية . جا أبو مطحس وذبح ذبيحتين وخلٌى العرس مختصر .. ماخذين معنى " خير البر عاجلة " . خشٌ مطحس على خزنة وصار اللي صار وعقب تسع شهور ولدت خزنة . وجابت ولد مخنز مثل ابوه .
يقولون راسه جاي مستقيم . وعيونه في جبهته . وان الولد وزنة 14 كيلو اول ماجابته امه .
جاكم مطحس وقال بأسمية على جدي " عبيد " وسماوته عبيد . تممٌ ولده بذبيحة واربع كراتين دجاج وانتهى ذاك العشا . وصار اسم الولد " عبيد " ..
مطحس هذا اخذ في باله وخاطرة . ان ولده لازم يطلع رجٌال . وماله الا انه يقسي عليه ولا يعلٌمه الدلع عشان بكرة يحكم بلد ولاهو اللي اخذ حنان من امه ولا ابوه ,
كبر عبيد وكبر . وصار عمره 4 سنوات . وكل ماطلعت امه خزنة ورجلها مطحس للسوق . وأشٌر على شي عبيد قالوا له مافيه . انت رجٌال عيب عليك تشتري اشغال مبزرة . واذا صاح يبيها عبيد جاكم ابوه مطحس . وسطر عبيد على اذنة وردفة بالثاني وسطرة على اذنة الثانية . وبدال مايشترون العالم من السوق . خلٌى العالم اللي ماتشتري تفرٌج على مطحس وهو يضرب عبيد .
بدت العقد النفسية . تكبر مع عبيد وصار يحسٌ انه مهوب مثل عيال جيلة . اللي معه سيكل ويدور بالحارة والا اللي معه طاولة كيرم ويلعب هو وولد جيرانهم ,
بمعنى ثاني . مطحس هذا ماخلٌى ولده يعيش سنٌه بهفاوته وغلطاته وشقاوته . يبي يكبٌره ويصير رجٌال وعمره ماتعدى العشر سنوات ..
كبر عبيد وكبر وهو على الوضع هذا ماتغيٌر كل مابغى شي قالوا له لا . والا انسطر على عينه .
يوم صار عمر عبيد 7 سنوات خشٌ المدرسة وهو بالفصل وخوياه المبزرة يستهبلون ويضحكون . يجون يكلمون عبيد .. ياعبيد ؟ عبيد . يقولهم بفهاوه هاه .. وش فيك ماتسولف معنا ؟ يظٌل ساكت الولد . فاقد الثقة بنفسة . وفاقد طلاقة الكلام . ولايقدر يحتسي مع احد " لأنه يحسٌ ان ابوه وراه بكل شي . ويمكن لاجابوا طاري ابوه يسويٌها على روحه من النفضة والخوف ..


:
: غلطااااااااااااان يا مطحس تعامل بزرك كذا !!! وأسمع الحل من عزوبي ..
:

كل انسان بهالدنيا .. يعيش حالة عُمرية منها الطفولة والمراهقة ومرحلة مابعد البلوغ ومرحلة الشيخوخه وتنسيم المخ !
ولدك اللحين توٌه متفتح على اشياء جديدة بالدنيا . انت وراك تعامله تسذا ؟
لابغا لعبة سطرته على وجهه والا اذا بغا كيس كتكات من البقالة قلت له يعوٌر اسنانك والا انت تحبٌ الكتكات ؟ حبٌه ورجعه !
كل شي له نسبة وتناسب . ما اقولك دلٌعه لين يصير مايع وخكري ولاتصير قاسي عليه .. امسك العصا من النص . شف نتايج فعايلك بولدك فقد الثقة بنفسة . ويحسٌ قبل لايتكلٌم ان كلامة الخطا وكل الخطا . ولا اندمج مع بزران جيلة ..
لا بغى شي ولدك عطه ولاتبخل عليه بس في حدود المعقول . ولاشفته أشٌر على شي مخيس ولاودٌك يدخل بيتك . فهمه بأسلوب النقاش وكأنك تناقش لك رجال ان هالشي مهوب زين ومضارة كذا وكذا وكذا وكذا .. واياني واياك يا مطحس تنظر لولدك نظرة انه بزر وماعليه تكله ! لو عمرة سنتين .. لاشفت ولدك قل حيٌ الله الرجال تعال تقهو معي وانا ابوك ,

جاكم مطحس وسمع كلام عزوبي .. وراضا عبيد وقام يعيد تأهيلة نفسياً بالمعاملة وكلٌ شي زين ,
بعد ماوصيت مطحس ان التغييرات اللي بتسويها لازم تطلع من امه اوٌل شي . وانت لاتجيه يامطحس من الباب للطاقة تقلب ملعنتك مع ولدك لكل شي يبية تجيبه له لا !
خل خزنة اول شي تبدا تشوف وش طلبات الولد وخلٌه تخمه لاجا من المدرسة وتفصٌخ شرابات بزرها وتشمٌ ريحتها ,
واذا ان عبيد طلب دفتر للمدرسة والا شنطتة انشقٌت ويبي وحدة جديدة . خذه انت وركبٌه للسيارة وأقرب مكتبة وقف عندها .. واذا ولدك راكب معك حاول انك تسولف معه وتاخذ علومه وتسأله و وو و وكيف دراستة . ولا دخلتوا المكتبة انت ووياه اشتر له الشنطة اللي يبيها لو قيمتها 45 ريال !

أعتدل حال مطحس وولده .. بس ان مطحس الله ياخذه للحين مايفهم الكلام !
يبي ولده علومه علوم وعمره بس 11 سنة ..



:
:
:

ذاك اليوم ,

جا عيد الضحيٌة ويصلخ مطحس ذبيحتة وهو يعزم ربعة وجماعتة على العشا الليلة .
ويقولهم لا احد يتأخر ! العشا الساعة تسع بالضبٌط واللي يتأخر بناكل عنه .
يوم جوا الضيفان من عقب المغرب جاكم مطحس وقال ولدي يا ولدي .. اليوم يومك ياولدي ابيك تسوق الدلٌة للرياجيل . وتصبٌها لهم خلٌهم يقولون عبيد بن مطحس ساق لنا الدلٌة وقهوانا . تحمٌس عبيد مع ابوه وشال دلٌه عراقية - بصراوية - الدلة من غير قهوة وزنها 25 كيلو ومع القهوة تصير 31 كيلو ! يعني دله كلها حديد بحديد . شالها عبيد بيده اليسار والفنجال بيده اليمين ( على حسب ماعلٌمه ابوه ) . ويبي يصبٌ لعمه جلوي فنجال .
يوم زلٌ القهوة عبيد . للفنجال وهي تنكٌب الدلة كلها بحضن عمٌه جلوي . ويصرخ صرخة عمٌه جلوي جابت اللي بالشارع العام كلهم . من حرارة أونسها في فخيذاته الأكيد . ان فخوذ عمٌه جلوي تزلٌغت من القهوة .
قام مطحس على ولده عبيد . وهو يسطره على عينه ! قدٌام الرياجيل والمجلس جميع .
وهو يمحطه على خشمه ! . وقدٌام الرياجيل والمجلس جميع .
وهو يمحطه بالعقال ! . وقدٌام الرياجيل والمجلس جميع !
أنحاش عبيد يبي الفكٌه من ابوه ! واندٌس ورا امه بالصالة ! وأمه خزنة ضعيٌفة مالها لاحول ولاقوة
ووخري عن ولدي انا اربيه مالتس شغل انتي !
وهو يمحط ولده بليٌ الغاز لين تليٌن عبيد . وقام يسبح وسط دموعة وسعابيلة .






ليييييييييييه يا مطحس تسوٌي بولدك كذا !!!!؟ تعال خذ الحل من عزوبي ..




أنت تبيٌ تربٌي ولدك تربية رجال . وتربية ماتخر الموية .. وتبيه أحسن من غيرة طيب . اسمع مني يامطحس الله لايكثر أمثالك !
الضرب ماهوب حلٌ في كل الأمور . والضرب تأثيرة يامطحس تراه على المدى البعيد بـ معنى ثاني . يمكن تخليه بذاكرتة طول ماهو حيٌ انه اخذ له علقة وهو صغيٌر منك بسبٌة دلة وفنجال ورجال . وتلقاه يمكن يكره جلسة الرجال ويتعوٌذ من ابليس اذا شاف دلٌة القهوة اللي انت تبي تربية عليها .
والغلط الثاني وأكبر غلط انك ضربتة وأرخصت ولدك قدام مجلسك اللي مليان رجال ! وخليته مايسوى نعلته اللي هو لابسها .. وفوق هذا كلٌه يمكن سبب انحراف ولدك انت ! اذا تأثر على المدى البعيد بعدين بسبب دبٌجك له وطاح بالخراب وقام يدقٌ الكاس بالكاس !.. ليه تضرب ولدك قدام الرياجيل ؟ كيف تبي ولدك يصير رجال وانت قاعد تكسرة وتهدمة قدام الرجال اللي تبيه يصير مثلهم !؟
اذا في راسك هياط وحبٌ طقة فنجال وجلسة شيوخ .. تعال قرٌب اذنك اعلمك .
لاتخلي ولدك يشيل دلة للرجال دامها اكبر منه ! اجل عمره 11 سنة وتبيه يشيل دله !!؟
تستهبل يامطحس انت !! ولدك عظامه لينه ولافيها حيل تشيل الدلال ومليانة قهوة ! خلة يكبٌر شوي وعلٌمه باللي هي احسن ,
بعدين تعال يامطحس ! اذا انك تبي تزرع في ولدك حبٌ الرجال والمجالس والعلوم والهياط اللي انا يامحاتسيك ما ادانية ! خله يخاويك للعزايم خله يخاويك للعروس .. ارتزٌ انت وولدك في صدر المجلس ولاتحقٌر بولدك . بس هاه انتبه يامطحس ولدك توٌه بزر ولازم يماشي عيال جيلة شوي وشويات . يعني ماتخلية لازق بنحر الشيبان وتشربه قهوه لين تفقع بطنه !
لا يامطحس الفرق كبير بين الشيبان والبزر حقك اللي بذيتنا فيه ! خله مع الورعنة شوي لين يطيح اللي براسة . هماني يامطحس اقولك امسك العصا من النص !!؟

سمع الكلام مطحس . وتسنه هو وولده اعتدلوا شوي ..

كبر عبيد وكبر وكبر .. وبطت اباطة يطلعن فيها شعر ! وبدا شنبه يخط بوجهه .
تعرف عبيد على شله مهيب داشرة زوينة ولاهم حقين خرابيط واستراحات .. وقام يخاويهم يتمشون مرة يتقههون في كوفي شوب . ومرة تلقاهم في صالة بلياردو ومرة تلقاهم في عازمهم واحد من العيال يم استراحات نمار .
جاكم مطحس مطفٌي النور وقام يشك بولدة هو وطلعاته من حرصة ووسوسته الزايدة الله يرفع عنه ولايبلانا !
يا ولد عبيد وين يروح كل عصرية ؟ ومن يماشي ؟ وياولد .. هو يتتن ولدي والالا ؟
يوم يخشٌ عبيد في البيت الا يجي مطحس يشطٌف ولده ويشمشمه وتسنه كلب بوليسي . يبي يورح فيه ريحة دخان والالا !؟
وتلقون مطحس يهريه التفكير قبل لايرقد .. واخر شي انه يرقد قروي قاعد مقٌعد وش تبون من وراه ؟
جا من بكرة .. ويجيكم الاشهب مطحس يحقق مع عبيد ..
يااااا عبيد ... يااااعبيد تعال .
انت وين تروح كل عصرية !؟ ومن تماشي . وانا شاك فيك انك تدخٌن ! اعترف ياعبيد !!
هنا عبيد حسٌ انه طاح من عين نفسة . وكل ماجاه واحد من خوياه يبيه يخاوية ذكر ابوه وشكٌه فيه . وليه ابوي يشكٌ فيني كذا .. يعني يبيني ادخن عشان اخلي ابوي متوكد اني ادخن !!! ليه ابوي كذا شكٌاك ولايبيني اطلع مع احد !؟ مرٌ اسبوع على ذا الحال وكل يوم يطلع عبيد . ولايرجع الا عقب العشا . اخرتها قفلت مع مطحس مايبي ولده يماشي احد . ذبحة التفكير ان المجتمع كله خربان ومنتهي !!
ويطلع برا البيت ويلقى عبيد وخويٌه معه واقفين على الباب .. ويجيكم مطحس مطفٌي النور .
ويقول وش فيك تمااااشي ولدي انت !!! لاعاد تمشي مع ولدي ولا عاد تقربة ! وان شفتك هنا ياويلك !
ووالله لأبلغ الشرطة فيك .. وو ووو و إلخ .
هنا عبيد كره نفسة !
عاف عمرة ! حسٌ انه ولاشي قدٌام خوية من بعد ماكان بينه وبين خويٌة كل التقدير والاحترام !!!
جاكم مطحس وكسٌر كرت ولده قدام خويٌة ! وخلاه مايسوى منديل البنقالي !





لييييييييييييييييه يامطحس تسوٌي كذا !! ليييييييييييييييييه !! تعالي يالثور خذ الحلٌ من عزوبي ..


:
:
:

اذا انك خايف على ولدك وتبيه منرزٌع في البيت ! لا يا ابن الحلال هالكلام مايصير ! تبي تعقٌد بولدك وتخليه في البيت مايروح ولايجي ؟ .. عشان يكون تحت عيونك وبكذا انت يامطحس ياثور تخليه يفقد لغة الحوار مع المجتمع ومايعرف يخارج نفسه ! ويصير كل ماجا يجدد بطاقة الاحوال حقته مايعرف يسوي شي ولايعرف يكلٌم احد يخارجه ولازم انت تخاوية .

أسمع يامطحس ,
في هالحالة وانت خايف على ولدك لاتحشرة بالبيت ! ولاتخلية بدون صاحب !
حاول انك تقعد مع ولدك قعدة رجال وتجيب الدلة والفنجال مثل ماكنت مع ولدك يوم انه صغير . وتشوف وتسأله بصيغة سوالف . ماهو صيغة استجواب وين وكيف وليه متأخر !؟
خلك معه بهالصيغة عشان تعزز الثقة في نفسة بكل الجوانب .
هذاك اللي لقيتك معه عند الباب هو ولد من وانا ابوك ؟ والرجال وشهو من لحية عساه صاحبن طيٌب ؟
والا اذا كان خوي عبيد في المجلس . حاول انك تجلس معهم وتسولف وتخلي نظامك زي نظامهم وتاخذ وتعطٌي . لاتخلٌي ولدك يوٌش منك عند خوياه . ويتحسس منك . لو تخليه يحسٌ ان بتلعن والدية لاراحوا ربعه !
وحاول بحكم خبرتك بالحياة تعرف خوي ولدك وشهو من لحية هو خربان والا صالح ؟ من كلامه من اسلوبة من توجهاته وينهي رايحة ؟
ولدك يامطحس لازم تعطيه الثقة ولازم تخليه ان عليه تكله وهو ولي العهد من بعدك واذا انك مت والا شي . يصير الملك بدالك وراعي البيت هو وإذا انك موسوس وتبي تعرف ولدك وين يروح والله مشكلة . كلٌم المشرفة حرير تشوف لك حل مع الوسواس !


رضا بالأمر الواقع هالمطحس . وخلٌى ولده وعطاه الثقة .. وكبر عبيد وصار رجال وتعسكر الرجال في المديرية العامة للدفاع المدني ( سوٌاق تريلة موية ) ثمٌن قال لأبوه زوجني يايبه . وقال ابوه هلا هلا هذي الساعة المباركة وانا ابوك . من تبي بس ؟ قال من بنات آخيك ..
عاد ان مطحس ماعنده الا خوات . قال بأزوجك وحدة من بناتهن . قال عبيد تم ٌ يبه أشٌر عليها بس وانا اخذها .. صمل عبيد واخذ سلوى بنت عمته .
أعرس عبيد .. وتزوٌج في قاعة الشموع اللي على الدائري .
تزوجٌ عبيد . وخش شبك الزوجية . بعد مالزخوة العسكر بالدورة العسكرية . وعقب ماشوته الشمس وهو مثبٌت بالميدان !
أخذ له سلوى بنات عمته . ذربة وزينة .. ويقولون انه تشق الجبهه شق من زين يقوطر فيها ويقولون بعد . ان جسمها زي الصنم اللي تلقونة بمحلات ملابس الحريم وملبسينة فستان ,
عقب خمس سنين من زواج عبيد . توفٌا ابوه مطحس , والله يرحمة .
وصار عبيد كل شغلة الشاغل رضا الله ثم رضا امه ورضا العمل .. واخر شي رضا حرمتة
لأنها كل ماطق عود بحصى جتكم سلوى وقعدت تنافخ على عبيد . والا تكلٌم وحدة من خواتها على التلفون الثابت وتنسى نفسها وتنسى بيتها وتنسى عيالها ! والا اذا رقدت ماقامت الا المغرب !
ما اعجبه عبيد هالحال حتى انه مرة من المرات زاد الهواش بين عبيد وسلوى وتعقدت الأمور .. وبغا يتهوٌر عبيد ويطلق حرمتة ويصرف لها ثلاث طلقات كل طلقة توجع الطلقة اللي قبلها !


ليييييييييييييه ياسلوى ليييييييييييييه ليييييييه تسوين كذا ؟

:
:
:
تعالي ياسلوى البسي نقابك وطرحتك واجلسي قدامي . ولاتناظرين بي واجد تراني على جريف !
ليه تسوين كذا ياسلوى مع عبيد ! تحسبين كل شي على عبيد !؟ لاااا ياروح امك انتي لا ..
ترا انتي راعية البيت .. وانتي الكل بالكل في البيت حتى لو ان السبهه عبيد موجود !
تتقولين لي وش لون ؟
انا اقولك وش لون .. تدرين ياسلوى انك تقدرين تخلين بيتك جنٌة وبعد تقدرين تخلينه العكس تخلينة جهنم !
تسألني سلوى تقول شلون ؟
يعني ياسلوى خليك ودودة .. وان قاله الله تصيرين ولودة وتجيبين لك درازن عيال ,
اذا عصٌب عبيد عليك .. لاتشدين وهو يشد .. لا ارخي الحبل انتي .. تراه هذا رجٌالك سترك وغطاك بعد الله أهق .
اذا شفتيه عصٌب .. اسكتي بإحترام وأدب .. ولاتسوين فيها حركات بنات ام ثمان طعش وتسع طعش وتعطينه نظرة من فوق لتحت ! لاياروح امك انتي .. ترا عبيد اعرفه من يوم كان صغيٌر ذيبان ويفهم هالنظرات المخيسة .
ثاني شي يا سلوى .
اذا شفتيه هاوش وانتم بغرفة النوم .. لايغزٌك ابليس وتطلعين وتخلينه يبربر لحاله تراه بيحسٌ كذا انتس ماتبينة وعفتي عشرته ! وإي شي يقولة يا سلوى قولي له طيب .. طيب لين تشوفين الرجال يهدا ويروٌق شوي .. بعدها اسألي قولي له خلصت يا ابو عيالي ؟ اذا قال ايه اطلعي .. واذا قال ايه انقلعي ابلعيها وامسحيها بوجه عزوبي .. وورية مقفاتس وعرض اكتافتس واطلعي .. بس هاه انتبهي تسحبين عليه ! انتبهي يا سلوى انتبهي ! لاتطيحين والله مايفرٌق بينكم الا كتابة العدل أهق
لاتخلينه يحسٌ انك سبحة بجيبة متى مابغاك طلٌعك ومتى ماطفشك دخلك جيبة . لاخليتس ياسلوى هواه اللي يشمٌه . خليك هوا صافي نظيف لاتصيرين شكمان ددسن موديلها 71 على خشمة !
وهماتس لاطلعتي برا الغرفة وانتم متهاوشين روحي اكنسي الصالة والا روحي رتبٌي الكنب بالمجلس . شوفي لك اي شغلة بالبيت .. عقبها بساعة والا ساعتين سوي له فنجال قهوة يعدٌل بها مزاجة . ويكيٌف صدقيني يا سلوى .. انتس بتكبٌرين بعينه وتصيرين الكل بالكل عنده ,
سألتني سلوى .. وقالت وهواشة لي وكلامة اللي يجرح !؟
ياسلوى يا خبلة .. اللحين الشرع وهو شرع مايوٌقع الطلاق اذا كان الواحد قافلن مخة ! يبربر ويقول اي شي .. ولو قال كلام ثاني يا سلوى اكيد ماراح تصدقينة لأن الاسلام الله يعزٌه رفع القلم عن اللي مقفل مخة ولايسجٌل طلاقة ! وش رايتس اذا كان كلام بايخ وكلام فيه جرحن لمشاعرتس يالبى مشاعرتس يا سلوى
بيجيك ويحبٌ على راسك . ويقولك انا اسف ومن هالكلام الزين , بس انتي ادمحي ولاتتدققين . ترا عبيد سبهه من يوم كان صغير اعرفه زين انا حتى انه يوم كان بالأبتدائية مايشتري شناط الا اللي عليها صوٌر دباب


:
ومشت حياة عبيد . ومشت حياة سلوى .. وجابوا وكتكتوا عيال .
واللي يبي يسأل عن حياة عيال سلوى وعبيد .. أقرا الموضوع من جديد واقلب بدال مطحس عبيد وتعرف باقي القصة ,

المرشد الطلابي / عزوبي ..
غرب الرياض - السويدي الغربي .